ŠOLTA / BRAČ – Tunel Šolta Brač iz pera Dinka Sule

ŠOLTA / BRAČ – Tunel Šolta Brač iz pera Dinka Sule

Objavio: Andrea Beader - 02.06.2022.

”Ovi dan tokalo me je puno štit o tunelu (koji će bit pod moren) od Šolte do Brača. A ništo san i jema prilike poslušat. Osta san zapižđen. Ma ča će nan tunel?”

Dinko Sule šoltanski je slikar i pjesnik. Rođen je 18. prosinca 1953. u Grohotama na otoku Šolti, gdje je završio osnovnu školu. Od 1984. godine piše poeziju koja se objavljuje u mnogim šoltanskim publikacijama. Izdao je nekoliko zbirki pjesama, a od 1987. godine bavi se slikanjem i član je Hrvatskog društva naivnih umjetnika u Zagrebu, a izlagao je na skupnim i samostalnim izložbama. Zastupljen je u monografiji Čudo hrvatske naive.

U nastavku donosimo njegovo pjesnički izričaj s temom gradnje tunela između otoka Šolte i Brača koji je početkom ove godine najavljen i uvršten u prostorni plan Splitsko-dalmatinske županije.

.
…A onda san se poče čudit samome sebi kako brž ja ništa ne razumin, kako me je vrime prigazilo. Sve je to od moji godin. Svaćan kako mi vrime izmiće. I onda mi ni bilo druge nego pokušat razmišjat o onome ča san uspi proštit a ča govori u prilog opravdanosti gradnje toga tunela.

Pa meju ostalin štijen: Blizina braškega aerodroma. Nu ti Boga, opravdanja. Pa šoltansko čuveno maslinovo uje bit će dostupnije, razumi se potencijalnin kupciman. A i čuveno vino, šoltanski dobričić, brže će se nać na stoliman onih koji volidu popit žmul lipoga crnjaka. Bogaremi, najebat će Bračani, nećedu više prodat ni kapju svoga uja, a i oni su ga zaštitili, ni litru svoga vina, svi će tunelon hrlit na Šotu.

A onda još štijem bit će boje medicinske usluge. Dobro je meni mater govorila; ne išći kruva svr šenice. Eto sad ispada kako mi Šoltani nismo zadovojni ča nas helihopter na portantinu privede u Split za desetak minuti. Sad će mo se vozit do Supetra po ure, a onda gliseron do Splita još dvadesetak minuti. Nismo zadovojni ni ča jemamo dva likara, ni ča jemamo hitnu medicinsku pomoć, trećega likara.
Pa štijem podatke o braškima ovcan, pa štijen kako će poljoprivreda izgradnjon tunela vazest maha. A onda opet kako će naša dica „navalit“ na braške sridnje skule. Nikad se nezna, Sveti futur čini čuda.

I višak pinez koje jema Europa je jedan od razlogi koji opravdavaju izgradnju tunela. Koliko nan je samo Europa potegla svojin magneton mladoga učenoga svita. Ali, kad Europa daje, vaja vazest, darovnome konju zubi se ne gledadu.

.
Nemojte mislit da san ja kontra tunela. Bože sačuvaj! Moje vrime prolazi, neka se gradi, na mladima svit ostaje. Samo san želi uvatit tu žicu opravdanosti gradnje.

Sveti future moli za nas. Izgradit će se tunel. Onda će ga vajat dat komegod na upravjanje, onda će ti niko, lipo, s tujin kurcen tuć po žeravi, i lipo ubirat tunelarinu.

A i Država će morat učit konat pa se bojin da to u kanati ne rezultira sa reduciranjen broski prug prima Šolti i nase put Splita. Onda će se dogodit da će naši gosti morat za doć na Šoltu potegnut priko Supetra, pa od Supetre priko Milne do tunela. Tako će in to poskupit boravak na Šolti, jerbo će se više morat vozit, deboto, bar, pedeset kilometri više. I kako san već napisa, nima đabe ni u stare babe, morat će tunelarinu platit. A, ni nan se boje ne piše. Ko ne plati kurbu, plati kurbu i likara.

I da bi vo napisa malo san „šara“ vin vragon, interneton, i onda štijen jedan od naslovi: Na šolti do 2023. (na Livki) u planu turističko naselje s hotelon visoke kategorije.

Brzo će to vrime pasat, još manje od dvi godine dan, vaja zaprit da se tunel ča prin napravi. Nemojmo timan našiman gostiman „visoke kategorije“ uskratit braški aerodrom. Ma ko se do tad ne napravi to turistiško naselje, izgradnja tunela bit će mu vitar u jidra, ko ne ništa, krešit će vridnost terena neizgrađene Livke. I još jedan od argumenat opravdanosti izgradnje tunela, štijen, podmorski su tuneli u skandinavskin zemjan. Vidila žaba da se konj kuje pa je digla nogu da i nju potkuju. Ma sigurno Skandinavci jemaju debele argumente isplativosti uloženih šoldi.

.
Neznan ča sve stoji u elaboratu koji opravdava tunelizaciju i neznan bi li ga uspi proštit za dva tri dana, jerbo to bi mora bit puno debeli libar. Niman vrimena, ne bi ga želi ni štit. Znan da od obilancije svit ne gine.

U današnje vrime, u XXI. viku suradnja nas Šoltani s našin dragin susidiman, Bračanima, u kulturnom pogledu i svakom drugom je neupitna, ako zato postoji voja.

Mea culpa, mea culpa, mea maxima culpa. Oprostite mi vi mladi ča volite Šoltu, ko san vas sa vin mojin pisanjen rastuži oli povridi. Kad volite škoj, znajte da ste uvik gubitnici, a ako se povežete s Bračen, tin tunelom, bit će te još i veći gubitnici, zato se rađe povežijite sa talafernon (Spliton) i zapirite se iz petni žil da na škoju boje živite. Zapirite se za više broski prug. Negledajte tuju kravu, jerbo u tuje krave veće je vime. Svojon kravi dajite dobro jist nek jon boje brizga vime. Molite Boga, suprostvjajte se onim koji vas uču da Boga nima. Jebeš škoj brez brodi?

__________

Autor: Dinko Sule, u Šolti brez tunela, veljača 2022.
Naslovna fotografija: Unsplash