KRK – Što je krabunosnica?

KRK – Što je krabunosnica?

Objavio: Iva Žanetić - 13.02.2018.

Krabunosnica, krinka, obrazina, krabulja – nazivi su za predmet ki pokriva nos i oči, del su kostima ki stvarno al „simbolički“ pokriva pršonu da ju ne moremo poznat.

Sakomu od nas, a da na to ni ne mislimo, najprvo vrime, pa mesto, fameja, društvo, crikva i tradicija odrede ulogu u društvo i ponašanje ko uz to gre i koga se moramo držat. I teško se čovik od nikih „zakoni“ liberat more, aš vavik rabi mislit ča će ov, al on reć. A od nikuda zvire potriba, ku nijedan ne more zatrt, da čovik u jeno doba leta klade krabunosnicuda zeme tuje lice i ponašanje onako kako se ne bi usudil zo svojin pravin licen.

I ontrat pride Mesopust. Vrime slobodno, vrime munjeno kada te zi sakoga kantuna niki glas ovizuje:

„Ma budi ča ćeš! Kladi krabunosnicu na obraz i kuntentaj svoju potribu da jimaš tuje lice i ponašanje. Uživaj u novu ulogu. Smij se, kantaj, tancaj. Delaj najbedastije bedastoće. Neka tvoja nova štorija od života veselo parti u svit. Bit će ti laglje i čudo veselije.

I zato: daj mašti na volju, zberi krabunosnicu najbolju!“

I ča ćeš ti? Ni ti gluho čut. Partiš za tin zovon. Jeno misec dan si drugi čovik. Kigod dan sam sebe ne poznaješ, pa se, zo pune usta smiha pitaš: „Ej, ma san to ja?“ I sam sebi odgovaraš: „Ma briga me, san al nisan ja, lipo mi je!“

I ontrat fini „kurbin pir“. Nisi se ni otriznil, a već na vrata Čista sreda bati da bi te ovizala:

Domisli se , čoviče, da si prah bil i da ćeš se u prah tornat.“

I ča ćeš, brižan? 40 dan Korizme vrime je u ko ćeš, moleć i čineć dobre dela, nać najbolji mod da najdeš samoga sebe, svoj obraz komu ni pred ljudi, ni pred Bogon ne rabi krabunosnica.

__________
Izvor: otok-krk.org
Fotografija: Pixabay-Gellinger